Hai uns días tivemos unha visita moi especial no noso colexio: unha mestra de Educación Infantil, pedagoga de excepción e moitas cousas máis: Mari Carmen Díez Navarro.
Na Hora de Ler, Mari Carmen entrou na Biblio, sentou no Trono e foi Contadora para as nenas e nenos de catro anos.
Eu, desde o meu buratiño, vin e escoitei:
Vin aos pequechos que escoitaban engaiolados El burro Cagaduros.
Vin como despois participaban encantados, aportando posibles solucións ante unha situación desagradable.
Vin tamén a moitas mestras que, nesa día, tocaban a súa orella na procura dos seus pendentes e percibían un lixeiro aroma a laranxa... (Talvez lembraban as lecturas de La oreja verde de la escuela, Los pendientes de la maestra, Mi escuela sabe a naranja...)
Eu, que son un Trasno e non sei de pedagoxías, vin e escoitei a unha mestra que me fixo un agasallo: un deses marabillosos Contos Populares, contado como se debe: sen artificios, claramente, coa linguaxe e as aportacións que só as avoas e avós son quen de ofrecer. ENCANTOUME. A Antonio R. Almodóvar, que hai anos recolleu este relato, tamén lle tería gustado.
Grazas, Mari Carmen.
Ningún comentario:
Publicar un comentario